Украинскиот министер за надворешни работи Андриј Сибиха изјави дека Украина е подготвена да се согласи на траен прекин на огнот и да се сврти кон дипломатијата, повикувајќи ја Русија да прифати безусловен прекин на непријателствата, пренесува Анадолу.

Изјавата уследи по разговорот со турскиот министер за надворешни работи Хакан Фидан во Киев.

Порака за благодарност до Турција

„Украина е подготвена за прекин на огнот на долг временски период за да го запре убивањето и да овозможи ефективна дипломатија. Русија, исто така, мора да се согласи на целосен и безусловен прекин на огнот“, напиша Сибиха на платформата X, заблагодарувајќи се на Турција за нејзината улога во мировните напори.

Тој нагласи дека доколку не постои искрена посветеност на Русија за мир, меѓународниот притисок мора да се зголеми.

„Се додека Москва одбива прекин на огнот и вистински напори за мир, меѓународниот притисок врз неа мора да расте“, додаде тој.