Европските лидери денеска ќе се состанат за да разговараат околу можните безбедносни гаранции за Украина, во момент кога војната со Русија се уште трае без изгледи за брзо завршување. Средбата, организирана од Франција и Велика Британија, има цел да даде политички сигнал дека Европа е подготвена да преземе конкретни чекори за поддршка на Киев. Германската влада влегува во разговорите со свои предлози, но истовремено внимателно избегнува каква било обврска за директна воена мисија во Украина. Канцеларот Фридрих Мерц и министерот за одбрана Борис Писториус јасно ставија до знаење дека Германија во моментов ја гледа најважната гаранција во јакнењето на украинската армија, а не во распоредување на трупи. Сепак, во Брисел и меѓу сојузниците постои загриженост дека Германија може да се повлече од иницијативите за можно идно мировно присуство.

Поделби во европските редови

Дискусијата за можно вклучување на европски мировни трупи предизвика сериозни несогласувања. Претседателката на Европската комисија Урсула фон дер Лајен изјави дека постојат прецизни планови за сценарија со мировни сили, што веднаш предизвика остра реакција во Берлин. Писториус порача дека такви теми не смеат да се најавуваат јавно пред да се седне на преговарачка маса, потсетувајќи дека Европската унија нема надлежности да одлучува за распоредување на војска. Канцеларот Мерц пак смета дека дебатата за мировни сили е прерана, бидејќи пред сe треба да се постигне примирје. Германската влада засега е подготвена да вложи средства во обука на украински војници, да обезбеди дополнителна воена техника и да го зајакне воздушниот штит на Киев. Но дилемата останува, дали Европа може да биде кредибилен партнер доколку не покаже подготвеност и за поголеми ризици на терен.

Во Брисел потсетуваат дека Германија сака да се позиционира како водечка сила во ЕУ, но тоа не може да го постигне со избегнување на клучните одлуки. Некои дипломати предупредуваат дека доколку Берлин наместо трупи нуди само финансиска поддршка, довербата во европската солидарност ќе биде нарушена. Американскиот фактор е исто така пресуден. Без јасна ангажираност од Вашингтон, европските држави тешко ќе најдат политичка волја да се впуштат во ризични операции. Од друга страна, американската администрација бара од Европа да дефинира што точно е подготвена да понуди, пред да одлучи за сопствено учество.

Сигурност преку јакнење на Украина

Наместо распоредување на војска, германскиот план предвидува долгорочно јакнење на украинските капацитети. Тоа подразбира засилување на воздушната одбрана за најмалку дваесет проценти годишно, подобрување на офанзивните способности со развој на ракети и друго напредно оружје во Украина, како и опремување на четири механизирани пешадиски бригади. Дополнително, предвидено е продолжување на обуката на украински војници и поблиска интеграција на одбранбената индустрија со европските партнери. Целта е Украина да стане доволно силна за да одврати секој иден напад, односно да се претвори во држава која може самостојно и ефикасно да се заштити од секоја закана.

Сепак, за целосна безбедност не е доволна само воената поддршка. Европските држави дискутираат и за политички гаранции, финансиска помош и побрза интеграција на Украина во европските институции. Францускиот претседател Емануел Макрон нагласи дека солидни безбедносни гаранции се неопходен предуслов за да може претседателот Володимир Зеленски да преговара за можен мир. Во меѓувреме, американската позиција останува клучна. Доколку САД не ја потврдат својата улога, европските иницијативи би останале без потребната тежина. За Украина, која и понатаму е жртва на жестоки напади, времето е драгоцено, а јасните гаранции би можеле да бидат првиот чекор кон постабилна иднина.