Универзитетот „Св. Климент Охридски”-Битола е првиот македонски универзитет што официјално е дел од меѓународната иницијатива „More Than Our Rank” која им дава можност на академските установи да ги истакнат различните начини на кои ѝ служат на заедницата.

Од УКЛО-Битола информираат дека иницијативата е развиена како одговор на дел од проблематичните карактеристики и ефектите од глобалното рангирање.

Со учеството во „More Than Our Rank”, академските установи укажуваат на потребата за одговорно оценување и признавање на поширока и поразновидна дефиниција за институционален успех. „More Than Our Rank” е поддржана од голем број меѓународни научни институции и респектабилни организации меѓу кои Европската Универзитетска Асоцијација-ЕУА, Европски Конзорциум на иновативни универзитети, Центар за наука и технологишки студии од Универзитетот во Лајден-Холандија и други, посочуваат од УКЛО-Битола и додаваат дека во оваа меѓународна иницијатива УКЛО гледа перспектива за свое автентично афирмирање во светски рамки благодарение на неговата различност, инклузивност, одговорноста кон заедницата и влијанието што го остварува во поширокиот општествен контекст.

Универзитетот „Св. Климент Охридски”-Битола во пристапната декларација е опишан како институција која инспирира и обезбедува квалитетно високо образование и светка перспектива за младите од Северна Македонија, односно тоа е Универзитет кој ја продолжува мисијата на Охридската книжевна школа основана од Свети Климент Охридски пред повеќе од 1100 години.