Микробиолошките резултати на водата во базените во тетовскиот регион делумно се задоволителни, единствен параметар кој отстапува е органското оптоварување на базените, кое се должи на големиот број на капачи во еден базен, велат од Центарот за јавно здравје Тетово. Оттаму апелираат сопствениците на базените да не мислат само на профитот, туку и на здравјето на граѓаните.

„Нормативот е 4 метри квадратни на еден капач, ако се претера тогаш ќе се поремети квалитетот на водата во базените. Но, исто така малку се применува првата дезинфекциона бариера. Значи мора најпрвин да се истушира капачот и да направи дезинфекција на нозете. Поради сето ова параметарот кој малку отстапува е органското оптоварување на водата во базените. Исто така наша препорака е 10% од вкупниот капацитет на водата да се менува, односно постојано да има дотур на кислород. Треба да се испитува и квалитетот на влезната вода во базените колку е поквалитна таа вода толку и помалку хемиски препарати ќе се користат. Секако колку што можеме треба да ги избегнуваме тие хемиски препарати оти освен микробиолошка опасност како втора опасност е хемиската опасност, ако се претера може да настрадаат капачите“, вели доктор Ратко Давидовски Специјалист по хигиена е здравствена екологија, вработен во Центарот за јавно здравје Тетово.

Неквалитетната вода во базените може да предизвика пред се кожни инфекции и стомачни вируси, но годинава се забележани многу ушни воспаленија кај децата.

„Колегите од ушно одделение ни кажаа дека имаат зачестени случаи на воспаление на уво, но тоа е повеќе од домашните базени, а од хемикалиите имаме стомачни тегоби, оштетување на кожата и слично. Во последно време имаме квалитетни базени кои имаат современи филтри и средства за дезинфекција, но грешката е во тоа што сопственците ги покираат базените и ја чуваат таа вода долго време и потоа велат стануваат лизгави базените. Тоа е тој биофил, тоа е основа и храна да се развиваат алги и бактерии и затоа препорачуваме почесто менување на водата во базените“, додава доктор Давидовски.

По задолжување на санитарната инспекција, сопствениците на отворените базени за капење и рекреација задолжени се да вршат редовни испитувања. Стандардна препорака е да се вршат еднаш неделно.