Продажбата на домови во Турција се зголеми за повеќе од 20 проценти во 2024 година во споредба со претходната година, покажуваат официјалните податоци цитирани од електронското издание на „Дејли Сабах“. Продажбата пораснала на речиси 1,48 милиони продадени домови, откриваат податоците на турскиот статистички институт (ТуркСтат). Во исто време, домовите купени од странци биле 23.781 или помалку за 32,1 отсто во споредба со претходната година. Русите се повторно на врвот на листата на странски купувачи со 4.867 купени домови минатата година, пред Иран (2.166 домови) и Украина (1.631 живеалишта).

Продажбата на домови скокнала за 53,4 отсто во декември во споредба со истиот месец од претходната година. Во последниот месец од 2024 г се продадени 212.637 домови во Турција. Податоците покажаа и дека продажбата на станови под хипотека пораснала 285,3 отсто во декември во однос на претходната година, но вкупната продажба на домовите под хипотека се намалила за 10,8 отсто, пишува „24Часа.бг“.