Турската државна Агенција за домување во масовни објекти (ТОКИ) презема мерки за изградба на модерни засолништа во сите провинции во земјата. Работата на овие модерни засолништа започнала за да им се обезбеди засолниште на граѓаните во случај на војна, катастрофа и истекување на нуклеарно гориво, јавуваат медиумите.

Турската влада разгледа различни сценарија поради војната и тензиите во регионот. Целта е да се создадат области каде што цивилите можат да бидат заштитени во случај на потенцијална војна или катастрофа. За време на неодамнешните војни и тензии на Блискиот Исток, се дискутираше за инфраструктурата на засолништата во Турција.

Според добиените информации, Министерството за животна средина, урбанизација и климатски промени започнало сеопфатна студија низ цела Турција, објави НТВ.

Студијата, која била дискутирана и на состаноците на кабинетот со кои претседавал претседателот Реџеп Таип Ердоган, го истакнала недостатокот на инфраструктура за засолништа во Турција и фактот дека постојните засолништа не ги исполнуваат стандардите.

Студијата исто така ги испитала и глобалните трендови, истакнувајќи ги примерите на Израел, Јапонија и Швајцарија. На состанокот на кабинетот беше одлучено дека ТОКИ ќе гради засолништа во сите 81 провинции.

Според информациите, градежните работи започнале во некои градови, првенствено во Анкара. Засолништата ќе бидат издржливи структури до кои може брзо да се пристапи во случај на катастрофи и кризи.

Прописите што се однесуваат на потребата од засолништа не се нови во Турција. Регулативата за засолништа, која стапи на сила во 1987 година, налага изградба на засолништа во згради со одредена големина. Сепак, ова барање во пракса беше во голема мера игнорирано.

Во многу станбени објекти, областите означени како засолништа се користат како паркинзи или како складишта.