Доналд Трамп ја избра поранешната демократска конгресменка, неговата поддржувачка Тулси Габард за директорка на Националните разузнавачки служби.

Габард, која некогаш беше претендент за демократската номинација за претседател на САД, е уште еден пример за критериумот на Трамп дека за клучните позиции во неговата администрација тој повеќе се потпира на лојалисти и личности кои се комплементарни со него, отколку на професионалци со долги години искуство во конкретната област, пренесува Бета.

-Знам дека Тулси ќе ѝ донесе бестрашност на разузнавачката служба. Таа ќе се бори за уставните права и ќе нè направи горди“, рече Трамп.

Тој посочи дека како поранешна кандидатка за претседателка на Демократската партија, таа сега има широка поддршка во двете партии, но е горда републиканка.

Инаку, Габард му помогна на Трамп во подготовката за септемвриската дебата со потпретседателката Камала Харис.

„Ако можам да му помогнам на претседателот Трамп на кој било начин, тоа е преку споделување на искуството што го имав со Харис на дебатната сцена во 2020 година“, рече таа во интервју.

Габард служеше во американската Национална гарда повеќе од две децении и беше распоредена во Ирак и Кувајт. Четири мандати беше демократска конгресменка и ги претставуваше Хаваите. Се кандидираше за претседател на демократските прелиминарни избори во 2020 година, пред да ја напушти партијата во 2022 година и да стане поддржувач на Трамп. Стана републиканка во 2024 година.

Како и Трамп, таа е отворен критичар на помошта за Украина, но и за американските воени интервенции во странство. Во исто време новизбраниот претседател го назначи и републиканскиот конгресмен Мет Гејтс за нов министер за правда.