По денешното судење каде обвинетиот Влатко Кешишев исто како и другите обвинети тврдеше дека во партијата „Десна“ се ковале планови за киднапирања, адвокатот на таткото на Вања, Владимир Туфегџиќ даде коментар дека ова е насоката во која требало да се одвива обвинението и истрагата на Обвинителството наместо кон тоа неговиот клиент Ѓорчевски да биде обвинет.

Обвинетиот Велибор Манев прв откри дека имало план да се вршат киднапирања зашто партијата Десна била во финансиска криза, се наближувале избори а пари немало. Дупката во Велес во која заврши животот на Панче Жежовски, била копана претходно, две години пред тој да биде убиен, што укажува на долгорочен план. Манев спомена дека имало и список на луѓе што биле потенцијални жртви на киднапирањето, меѓу кои  бизнисмен и ќерка на фармацевт кои живееле во зградата од каде беше грабната Вања.

Александар Ѓорчевски апсолутно нема никаква инволвираност, меѓутоа го слушнавме и она што сите треба да не загрижи. Добивме потврда од уште еден сведок дека година дена наназад пред случувањата во Велес и во Скопје се правеле планови, се подготвувале грабнувања на луѓе и се подготвувале за активности кои сите нас треба да не загрижат. Наместо Јавното Обвинителство и истражните органи да тргнат во таа насока, за жал, ја дефокусираа истрагата со неоснованото обвинување за Александар а тоа е пред се поради непостоењето на унифицираните стандарди и процедури за постапување во ваков случај, рече Туфегџиќ.

Тој рече дека обвинителството не постапило по пријавите за тортура, ниту по известувањето што Туфегџиќ го доставил до нив дека дел од доказниот материјал е објавен во странска држава. Со ова тој алудираше на материјалите што ги објави српскиот политичар Срѓан Ного. 

-Имаме тука многу прашања на кои не добивме одговор и се надевам дека во наредниот период обвинителството ќе преземе нешто, рече Туфегџиќ.