Триесетина автобуси на Јавното сообраќајно претпријатие – Скопје денеска не сообраќаат поради немање метан, изјави попладнево за МИА Меџит Идризи, потпретседател на синдикалната организација при ЈСП.

Идризи појасни дека разбрал од колегите дека автобусите се повлекуваат во гаража бидејќи немале метан. Според неговите информации, проблемот бил во тоа што јавното претпријатие немало платено за горивото.

Поради ова се случувало во текот на денот странци да не можат да отидат да ја посетат Матка, вели тој.

Идризи се осврна и на неизвесноста околу тоа дали ќе се исплати плата до законскиот рок – 15 декември, нагласувајќи дека вработените ги фаќа паника и му се обраќаат, особено тие кои имаат кредити за плаќање.

Тој повика да се решат состојбите во јавното претпријатие кои траат со месеци и да има и редовни плати и редовни автобуски линии.