Три жени планираат да го тужат контроверзниот инфлуенсер Ендрју Тејт, обвинувајќи го дека наводно ги силувал и сексуално ги злоупотребувал. Тврдат дека трпеле физички и психички последици, кои неколку години ги спречувале да работат или да живеат нормален живот. Тие првпат пријавиле во полиција пред осум години, но велат дека детективите не ги истражиле соодветно наводите и го отфрлиле случајот, пишува „„Скај њуз““.

„Гледајќи ја популарноста и влијанието на Ендрју Тејт како расте, иако знаевме кој е тој и што направил, беше исклучително тешко за нас кои беа сексуално и физички малтретирани од него. Имаме намера да докажеме на суд дека Ендрју е навредлив и дека неговите јавни изјави за жените не се ништо повеќе од фантазија“, изјавила една од жените.

Жените, во доцните 20-ти или раните 30-ти, работеле како модели за Тејт во Лутон од 2013 година наваму и тврдат дека биле малтретирани, недоволно платени и им се заканувале дека ќе ги спречат да одат во полиција.

„Нивните наводи вклучуваат силување, сексуален и физички напад, вклучително и држење пиштол на главата, давење со појас, наводи за најгрозоморно однесување кон жените“, рече нивниот адвокат Мет Јури.

Тејт ги негираше нивните обвинувања и преку својот адвокатски тим рече дека „сакале пари бидејќи тој ги отпуштил“. Полицијата во Хертфордшир почна да ги истражува наводите на жените во 2015 година и три пати ја уапси Тејт под сомнение дека силувал две жени и нападнал трета. Случајот е отфрлен по четири години, а полицијата се извини за бавната истрага.

„Кога отидоа во полиција, нивните тврдења не беа сфатени сериозно, полицијата не презеде ефективни дејствија. Доказите беа таму. Ние сме свесни за доказите што беа обезбедени, требаше да бидат доволни за да се оправда соодветна кривична истрага и според нас, обвинението“, истакна Јури.

„Ако тие обвиненија беа покренати и тој беше уапсен овде во Англија, тогаш можеби немаше да побегне во Романија каде што се тврди дека извршил дополнителни ужасни злосторства против жените“, додаде тој.

Тејт (36), британско-американски државјанин со шест милиони следбеници на Твитер, моментално е во домашен притвор во Романија, каде што полицијата го истражува поради сомневање за трговија со луѓе, силување и сексуална експлоатација.