Бившиот американски претседател Доналд Трамп ја критикуваше сојузната истрага против Руди Џулијани и рече дека не знае што барале агентите во станот и канцеларијата на неговиот бивш личен адвокат.

Сојузната полиција вчера го претресе станот на бившиот градоначалник на Њујорк, и заплени електронски уреди во рамки на истрагата за неговите деловни бизниси во Украина. Засега не е службено обвинет.

„Тоа е многу, многу нефер“, рекол Трамп за „Фокс“ во телефонско интервју. „Руди е патриот кој ја сака оваа земја и немам поим што бараа, што правеа“, додаде тој.

Истражители извршија претрес во станот на Џулијани, запленети се негови електронски уреди

Адвокатот на Џулијани, Боб Костело потврди дека властите заплениле електронски уреди, вклучувајќи го и мобилниот на Џулијани, притоа сугерирајќи дека истрагата е политички мотивирана.

„Градоначалникот Џулијани не само што го негираше ова обвинение, туку и два пати во последните две години понуди да покаже како тоа во целост е невистина“, се наведува во изјавата. „Но, понудата два пати беше одбиена“.