Поранешниот американски претседател Доналд Трамп е ранет при атентат за време на предизборен митинг во Пенсилванија, во сериозен инцидент што ќе има огромно влијание врз кампањата и изборите во ноември.

Трамп бил ранет во увото со куршум што атентаторот го истрелал од пушка, најверојатно од позиција на покривот на зграда спроти бината на која говорел претседателскиот кандидат на републиканците. Трамп објави дека се чувствува добро, дека му била укажана итна помош и најави дека ќе продолжи со планираните активности од кампањата.

Осомничениот атентатор, пак, бил итно лоциран и ликвидиран од припадници на Тајната служба што се грижат за безбедноста на поранешниот претседател. При атентатот било убиено едно лице што учествувало на митингот, а уште неколкумина биле ранети. Службите не го објавија итно името на ликвидираниот атентатор ниту имаат цврсти сознанија дали дејствувал сам и кои му биле мотивите.

Инцидентот бил снимен од низа камери. Само што Трамп го почнал своето обраќање до симпатизерите, се слушнале неколку истрели, по што се гледа како тој клекнува и рефлексно се фаќа за десното уво. Припадници на Тајната служба итно го извлекле од бината и го префрлиле во возило за да го однесат до локален медицински центар. Лекарите што му ја третирале раната истакнале дека тој е општо добар и дека не изгубил многу крв.

– Во истиот миг знаев дека нешто не е во ред. Слушнав зуење, истрели и итно го почувстував куршумот што ми ја проби кожата. Ми потече многу крв, па дури тогаш сфатив што се случува – напиша Трамп на својата социјална мрежа.

Тој им се заблагодари на Тајната служба и на сите други служби поради итната реакција.

– Најважно е да им изразам сочувство на семејството на лицето што беше убиено и до семејствата на оние што беа ранети. Неверојатно е таков чин да се случи во нашата земја. Господ да ја благослови Америка – порача Трамп.

Претставникот на Тајната служба Ентони Гуљелми соопшти дека агенти на службата смртно го застрелале осомничениот атентатор, чиј идентитет е откриен. Тој додаде дека уште едно лице било рането и дека уште две биле „критично ранети“, но не објасни дали од атентаторот или од агентите во обидот да го ликвидираат.

Гуљелми додаде дека биле преземени сите потребни мерки за заштита и дека Трамп е безбеден, но не кажа како било можно да не се провери место толку близу до бината, од кое потенцијален атентатор „како на дланка“ пред себе би ги имал сите говорници и луѓе во толпата.

Истрагата ја води Федералната полиција, која го третира инцидентот како атентат. Извори од службите за безбедност изјавиле за „Си-би-ес њуз“ дека атентаторот бил маж вооружен со пушка и дека стрелал од позиција неколку стотини метри од бината.

Полковникот Џорџ Бивенс од полицијата на Пенсилванија изјави дека припадниците на полицијата „херојски одговориле на нападот“ и забележа дека „нема причини да се верува дека се уште има активна закана“.

Се смета дека „гнездото“ на атентаторот било на покривот на еднокатна зграда десно спроти бината од која се обраќал поранешниот претседател. Учесник на митингот изјавил за Би-би-си дека забележал „сомнителен маж“ како наведнат чекори на покривот околу пет минути откако Трамп излегол на бината, за што ги алармирал полицајците.

– Тој имаше пушка, јасно можев да го видам со пушка. Им го покажавме на полицајците: „Еј, има тип со пушка на покривот“, а полицијата не знаеше што се случува – изјавил очевидецот.

По истрелите, агентите од Тајната полиција се стрчале преку толпата, викајќи им на сите да се спуштат на земја. Луѓето послушале и не се создал метеж ниту голема паника.

Shooting just happened at The Trump rally pic.twitter.com/Xs1dVL1H3T

— Acyn (@Acyn) July 13, 2024

Атентатот веќе стана главен момент од жестокиот предизборен судир. Моментот како Трамп со крваво уво и со високо крената тупаница ги поздравува симпатизерите, пред да влезе во возилото, сигурно ќе стане главен белег на неговата кампања и на неговата политичка кариера воопшто.

– Ова е борецот што ѝ треба на Америка – порачал Ерик Трамп под фотографијата на неговиот татко со крваво уво и крената тупаница.

Претседателот Џо Бајден објави дека телефонски му се јавил на Трамп и му посакал брзо заздравување. Претседателот заради инцидентот ги прекинал обврските и се вратил во Белата куќа, а неговиот предизборен штаб привремено ги запре политичките соопштенија.

– Сите мора да го осудат насилството во Пенсилванија. Не можеме да дозволиме ова да се случува. Не можеме да бидеме вака. Не можеме да се однесуваме вака – порача Бајден.

Лична поддршка на Трамп му изразиле и други политички противници, од поранешните претседатели Барак Обама, Бил Клинтон и Џими Картер, па се до поранешната лидерка на Конгресот Ненси Пелоси, која водеше два процеса на импичмент на поранешниот претседател.

Потпретседателката Канала Харис изрази олеснување поради тоа што Трамп не бил сериозно ранет и го осуди нападот.

– Сите се молиме за него, за неговото семејство и за сите што беа повредени или погодени од ова бесчувствително пукање – изјави Харис.

Обама порача дека „во нашата демократија нема апсолутно никакво место за политичко насилство“.

– Моите мисли и молитви сега се со поранешниот претседател Трамп. Благодарен сум поради решителниот одговор на службите за безбедност. Америка е демократија. Неприфатлив е каков било вид политичко насилство – изјави лидерот на малцинството во Претставничкиот дом, Хаким Џефрис.

Истакнати републиканци итно ја префрлија одговорноста врз претседателот Бајден, обвинувајќи го дека „настојува да посее страв што ќе се случува ако Трамп се врати на власт“. Конгресменот Мајк Колинс го обвини Бајден дека „го поттикнал атентатот“, а сенаторот Џеј Ди Ванс, кој е во игра да биде кандидат за потпретседател, изјави дека за нападот „директно придонесла реториката од кампањата на Бајден“.

Роберт Кенеди Џуниор, кој на изборите во ноември настапува како независен кандидат, и против Бајден и против Трамп, им порача на Американците дека е „крајно време меѓусебно да се почитуваат во политичката арена“.

– Мојата порака до луѓето е дека мора да го отфрлиме насилството, не само насилството, туку и омразата и отровот – изјави Кенеди.

Тој го носи името на својот татко, кој како претседателски кандидат беше убиен во 1968 година. Неговиот стрико Џон Кенеди, пак, беше убиен во историскиот атентат во Далас во 1963 година.

– Јас веројатно подобро од кој било друг ги знам импликациите од ова врз нашата земја – додаде Кенеди помладиот.

Енди Бигс, републикански конгресмен од Аризона, оцени дека инцидентот во Пенсилванија темелно ќе ги промени сите политички кампањи во САД.

– Само ќе ви кажам дека сметам дека од сега па натаму митинзите ќе бидат организирани во сали, каде што има поголема контрола врз присутните и врз она што се случува – изјави Бигс.

Тој укажа на иницијативата на демократски конгресмени да се укине придружбата од Тајната полиција за осудени лица.

Трамп најави дека нема да го откаже учеството на Националната конвенција на Републиканската партија што треба да се одржи во Милвоки идната недела. На конвенцијата Трамп официјално треба да биде промовиран во претседателски кандидат, а тој таму треба да објави кој ќе биде неговиот партнер – кандидат за потпретседател.