Претседателот на Соединетите Американски Држави, Доналд Трамп, потпиша нова извршна наредба со која им се олеснува на државите и градовите отстранувањето на бездомниците од јавните простори и нивното преместување во установи за ментално здравје и лекување од зависност.

Според соопштението на Белата куќа, наредбата ѝ наложува на државната обвинителка Пам Бонди да „ги поништи судските преседани и да ги прекине декретите за согласност“ кои наводно ја ограничуваат можноста на локалните власти да притвораат луѓе кои претставуваат ризик за себе или за другите, објави Си-би-ес Њуз.

Наредбата, исто така, обезбедува федерално финансирање за преместување на бездомници за кои се вели дека „предизвикуваат јавна непријатност“ или страдаат од „сериозна ментална болест или зависност“ во центри за лекување, амбулантска нега или други установи.

Белата куќа соопшти дека Бонди ќе соработува со неколку федерални оддели, вклучувајќи го Министерството за здравство и човечки услуги, Министерството за домување и урбан развој и Министерството за транспорт, за да се даде приоритет на финансирањето за градовите и државите што спроведуваат забрани за кампување и употреба на нелегални дроги на јавни места.

Портпаролката на Белата куќа, Каролин Левит, изјави дека со наредбата, Трамп „го исполнил своето ветување повторно да ја направи Америка безбедна“ и „да стави крај на бездомништвото низ целата земја“.

Според неа, со „отстранување на скитниците на криминалците“ и насочување на средствата кон програми за лекување на зависности, администрацијата сака да создаде побезбедни заедници и да им обезбеди помош на оние на кои им е најпотребна.

Трамп потпиша извршна наредба за распуштање на Меѓуагенцискиот совет на САД за бездомништво, тело кое ги координираше стратегиите за борба против проблемот со бездомништвото.

Трамп објави за време на кампањата во пролетта 2023 година дека, доколку се врати во Белата куќа, ќе ја користи секоја алатка и овластување за отстранување на бездомниците од улиците на Америка.

Одлуката беше остро критикувана од организациите за човекови права, пренесува Танјуг.

Националниот правен центар за бездомници оцени дека наредбата не ги опфаќа основните причини за бездомништво и дека присилното лекување е неетичко, неефикасно и нелегално.