Американскиот претседател Доналд Трамп разгледува голем број опции за спроведување воени напади против нарко-картелите што работат во Венецуела, вклучително и можни напади врз цели во земјата.

Според извори блиски до администрацијата, овие потези се дел од поширока стратегија насочена кон ослабување на венецуелскиот претседател Николас Мадуро, кого САД го сметаат за одговорен за широко распространета трговија со дрога што влијае на целиот регион, објавува CNN.

Неодамнешниот смртоносен напад врз наводен брод за дрога што ја напушти Венецуела беше еден од тие потези. Според изворите, нападот е само почеток на поширока кампања за сузбивање на трговијата со дрога, што на крајот би можело да доведе до политички колапс на Мадуро. Администрацијата на Трамп верува дека ваквите напади би можеле да извршат притисок врз оние во околината на Мадуро кои профитирале од нелегалните приходи на картелите, што би можело да доведе до нивен обид да го соборат венецуелскиот претседател.

Во петокот, Трамп одговори на новинарско прашање за можна промена на режимот во Венецуела, велејќи: „Не зборуваме за тоа, но зборуваме за фактот дека Венецуела имаше многу чудни избори“. Со тоа, тој алудираше на минатогодишните претседателски избори во Венецуела, кои беа под сомнение поради обвинувања за изборни нерегуларности.

За да ја покажат сериозноста на своите намери, САД го зголемија своето воено присуство на Карибите во последните недели. Во близина на Венецуела сега се наоѓаат бродови опремени со ракети Томахавк, напаѓачка подморница, повеќе од 4.000 американски морнари и маринци и десетина борбени авиони Ф-35 кои се преместени во Порторико. Овие воени сили имаат за цел, покрај заштитата на американските интереси, да испратат јасна порака до Мадуро.

Администрацијата, исто така, ги засили обвинувањата против Мадуро, кого го етикетира како наркотерорист со врски со озлогласени картели. Наградата за негово апсење е зголемена на 50 милиони долари. По одлуката, Трамп претходно даде зелено светло за спроведување смртоносни воени операции против картелите, третирајќи ги осомничените трговци со дрога како непријателски борци, а не само криминалци.

Претседателот на Венецуела синоќа изјави дека Каракас е подготвен да премине од „политичка фаза“ во „фаза на вооружена борба“ во случај на напад од страна на САД, во услови на ескалација на тензиите меѓу двете земји, јави ДПА.

„Моментално сме во политичка фаза“, рече Мадуро во коментарите емитувани на венецуелската државна телевизија. „Но, ако Венецуела биде нападната на кој било начин, ќе преминеме во фаза на вооружена борба“ додаде тој.