Американскиот претседател Доналд Трамп разговарал со својот руски колега Владимир Путин  за нуклеарното разоружување за време на разговорите во Алјаска, изјави Трамп пред новинарите во Белата куќа на 25 август.

„Мислам дека денуклеаризацијата е многу, многу голема игра. Но, Русија е подготвена да го стори тоа, а мислам дека и  Кина ќе се согласи за истото. Не смееме да дозволиме нуклеарното оружје да се шири. Мора да го запреме нуклеарното оружје“, рече Трамп, без да открие детали од разговорот.

Кремљ не ја коментираше изјавата на Трамп.

Според најновиот извештај на Федерацијата на американски научници (FAS),  Русија има вкупен арсенал  од 5.580 нуклеарни боеви глави, вклучувајќи и околу 1.200 што чекаат демонтирање. Оваа бројка ја прави Русија земја со најмногу нуклеарни боеви глави во светот.

Рускиот нуклеарен арсенал вклучува тактичко оружје за употреба на бојното поле и стратешко оружје способно да стигне до територијата на  САД.

Москва постојано упатуваше нуклеарни закани против Украина и Западот откако ја започна инвазијата  во февруари 2022 година. Иако тие закани не се материјализираа, загриженоста за руските воени амбиции надвор од Украина продолжува.

До денес, разговорите за контрола на нуклеарното оружје меѓу Москва и Вашингтон не постигнаа никаков напредок.

Недели пред средбата на 15 август меѓу Трамп и Путин во Алјаска, американскиот претседател нареди две американски нуклеарни подморници да бидат преместени во „соодветни региони“ како одговор на провокативниот јазик на поранешниот руски претседател Дмитриј Медведев.

Медведев рече дека зголемената вклученост на Вашингтон во завршувањето на војната на Русија против Украина може да ги доближи САД и Москва до директен конфликт. Тој постојано се закануваше со нуклеарна ескалација и ширеше пропаганда од Кремљ, прикажувајќи ја Русија како жртва на западната агресија.

Трамп го обвини Медведев дека „влегува во многу опасна територија“, нарекувајќи го „неуспешен поранешен претседател“ и предупредувајќи го да „внимава на зборовите“.