Американскиот претседател Доналд Трамп изјави дека ќе ѝ наложи на федералната полиција да помогне во сузбивањето на криминалот во Чикаго и Балтимор, и покрај силното противење од државните и локалните власти во тие градови.

„Чикаго е многу интересен бидејќи ги гледав како велат: „Не ни треба помош, безбедни сме“, но пред две недели, шест лица беа убиени, а 24 лица беа застрелани“, рече Трамп, без да прецизира точен датум за испраќање на федералните сили, објави Политико.

Претседателот ја пофали градоначалничката на Вашингтон, Муриел Баузер, за нејзината соработка со федералните сили, додека го критикуваше демократскиот гувернер на Илиноис, Џ.Б. Прицкер, кој рече дека криминалот во Чикаго не бара федерална интервенција.

„Доколку гувернерот на Илиноис ме покани, би сакал да го направам тоа. Сега ќе го направиме тоа без оглед на тоа. Имаме право да го сториме тоа бидејќи имам обврска да ја заштитам оваа земја“, рече Трамп.

Градоначалникот на Чикаго, Брендон Џонсон, рече дека насилството во градот произлегува од премногу оружје на улиците што шверцерите го внесуваат во Илиноис од соседните држави, вклучувајќи ја и Индијана, предводена од републиканците.

„Чикаго ќе продолжи да има проблем со оружјето сè додека црвените држави продолжуваат да имаат проблем со оружјето“, рече Џонсон, според АП.

Трамп, исто така, рече дека има обврска да ја заштити Америка, вклучително и Балтимор.

Локалните претставници во Балтимор му се придружија на демократскиот гувернер на Мериленд, Вес Мур, во спротивставувањето на интервенциите на федералната полиција.

Трамп веќе ја испрати Националната гарда во Вашингтон, а неодамна објави планови за преземање слични чекори во други градови, како што се Њујорк и Чикаго, кои се управувани од демократите.