Претседателот на Соединетите Американски Држави, Доналд Трамп, ја нарече шведската активистка Грета Тунберг „проблематична и луда“, коментирајќи ја нејзината депортација од Израел заедно со стотици пропалестински активисти, пренесува Тајмс оф Израел.

„Таа е едноставно проблематична. Веќе не се грижи за животната средина, а сега го прави ова? Има проблем со управувањето со гневот, мислам дека треба да посети лекар. Таа е млада и толку лута, толку луда“, изјави Трамп пред новинарите во Овалната соба, објави Скај њуз.

Тунберг, која слета во Атина со група од 161 активист од речиси 20 земји по депортацијата, брзо му одговори на американскиот претседател.

„Ја ценам грижата на Трамп за моето ментално здравје откако тој повторно ги изрази своите многу ласкави мислења за мојот карактер“, напиша таа на социјалните мрежи.

-До Трамп: Би ми било драго да ги примим сите ваши препораки за решавање на овие таканаречени „проблеми со управување со гневот“, бидејќи, судејќи според вашата импресивна евиденција, се чини дека и вие страдате од нив – додаде Тунберг.

Тунберг претходно изјави дека „меѓународниот систем ги предал Палестинците“ откако таа и други активисти се обиделе да достават хуманитарна помош во Газа со флотила бродови.

Израел потврди дека депортирал вкупно 341 активист, вклучувајќи ја и неа.