Поранешниот американски претседател Доналд Трамп го тужи својот поранешен адвокат Мајкл Коен, барајќи отштета од над 500 милиони долари, пренесува Би-Би-Си.

Коен сведочеше пред големата порота на Менхетен, која подоцна го обвини Трамп за 34 точки од обвинението за фалсификување деловни досиеја, што претставува прв пат во американската историја поранешен претседател да биде обвинет за кривично дело.

Трамп, кој соопшти дека сака да се кандидира за претседател во 2024 година, се изјасни за невин на 4 април.

Во новата тужба, поднесена во американската сојузна држава Флорида, Трамп го обвини Коен дека ги прекршил правилата на односот адвокат-клиент со откривање на информации кои му биле дадени во доверливост, како и за „ширење невистини“.

Трамп беше обвинет за погрешно прикажување на исплатата на пари како деловен или правен трошок, во времето кога ја започна својата прва претседателска кандидатура, која беше искористена за да се купи молкот на тогашната порно ѕвезда Сторми Даниелс за сексуалните односи што таа наводно ги имала со Трамп десет години порано.