Американскиот претседател Доналд Трамп вчера разговараше со претседателот на Полска, конзервативниот националист Карол Навроцки во Белата куќа. Тој рече дека САД би можеле да го зголемат своето воено присуство во Полска и вети дека ќе се погрижи за одбраната на земјата.

Трамп, кој го пречека својот сојузник со прелет на воени авиони, рече дека САД имаат „неверојатен однос со Полска“, пренесува Ројтерс.

На прашањето на новинарите дали планира да ги задржи американските трупи во Полска, Трамп одговори потврдно.

„Ќе испратиме уште повеќе војници ако Полјаците го сакаат тоа“, рече тој.

По средбата, Навроцки рече дека разговарал со Трамп за зголемувањето на бројот на американски трупи и додаде дека Трамп убедливо ја гарантирал безбедноста на Полска.

Присуството на американската армија на источното крило на НАТО, вклучително и Полска, останува едно од клучните прашања за Варшава, која бара гаранции за безбедносна поддршка во екот на војната меѓу Русија и Украина, пренесува Танјуг.