Актерот Тони Михајловски упати остри критики за состојбите во културата, откако вработените во овој сектор не добија плати пред Велигден, а синдикатот протестираше и обвини дека надлежните се обидуваат да им ги скратат платите. Михајловски не го поштеди министерот Зоран Љутков, за кого напиша „јаден он и јадна култура сосе туризам“.

„За пуста функција и преку трупови ќе газите. Заборавате кои сте биле и сите што ве знаат ги бришете од „живи“ за да „умре“ со нив и вашата вистина. Ама не умира пустата туку о.ц „како шило врти врти и ќе излезе на другата страна” з.ц. Авторот на цитатот добро познат на „војводите”, вели Михајловски во објавата.

„Ја умревте културата. Ја распнавте, ѝ заковавте клинци и ја оставивте да умре. Симболично или не, баш пред Велигден. Знаете што следува, нели. Таа ќе „воскресне“ и ќе ви покаже дека е поголема и побитна од сите вас во институциите, оптан-топтан. Се гледаме на „барикадите“ пошто на сцена не заслужувате да се гледаме, а реално и слабо одите у театар. Вечерва имаме претстава. Онаа популарната. Онаа што „министерот“ не ја гледал пошто била добра. Јаден он и јадна култура сосе туризам. Најверојатно ќе играме за да не ја изневериме публиката која платила карти, а ние сè уште немаме плата. И најверојатно заради среќните робови кои се најголеми непријатели на Слободата“, пишува Михајловски.