Поранешниот британски премиер Тони Блер би можел да стане шеф на преодната власт во Газа, пишува списанието „Економист“. Според овие наводи, како дел од планот за управување со територијата по завршувањето на непријателствата, се разгледува формирање на тело наречено Меѓународна преодна власт во Газа (ГИТА), на чие чело би можел да биде Блер.

Списанието потсетува дека поранешниот британски премиер бил во Газа неколку пати од почетокот на војната и дека е активно вклучен во развивањето план за управување со оваа територија во постконфликтниот период.

„Тој е подготвен да го жртвува своето време. Искрено сака да ја заврши војната“, изјавил еден од изворите запознаени со политичарот, пренесува „Економист“.

Доколку ја преземе оваа улога, на Блер би му била доделена една од најпредизвикувачките задачи во меѓународната дипломатија – да обезбеди стабилност и почеток на реконструкција во регион кој со години е сцена на вооружени конфликти и длабоки поделби.