Џакарта е дом на околу 10,6 милиони луѓе и околу 30 милиони во градската област. Сепак, градот тоне – околу 40 отсто од областа сега е под нивото на морето. Индонезиската влада планира да го премести главниот град во Нусантара, нов град кој се гради на источниот брег на Борнео, околу 870 милји северно од Џакарта.

Се проценува дека процесот ќе чини 35 милијарди долари и нема да биде завршен до 2045 година. Сепак, околу 6.000 вработени во владата се очекува да се преселат таму навреме за инаугурацијата на следниот претседател во октомври.

Оваа одлука не е без преседан. Бразил го пресели својот главен град од Рио де Жанеиро во Бразилија во 1960 година, додека Абуџа го замени Лагос како главен град на Нигерија во 1991 година. Но, ова е првпат климатската криза да има улога во процесот. Во последниве години, зголемувањето на нивото на морето ја направи Џакарта мегаград кој најбрзо тоне во светот, што ја поттикна одлуката на индонезиската влада да го пресели главниот град.

Во август 2019 година, индонезискиот претседател Јоко Видодо го одобри планот за преместување на главниот град од Џакарта во Нусантара.

Местото во Источен Калимантан е избрано затоа што е блиску до морето и има релативно мал ризик од земјотреси, цунами или вулкански ерупции.

Прекумерното повлекување на подземните води придонесе за стапки на слегнување до шест инчи годишно, а 40 отсто од градот сега е под нивото на морето.

Експертите за животна средина предупредуваат дека една третина од Џакарта би можела да биде потопена до 2050 година доколку слегнувањето на земјиштето продолжи со сегашното темпо. Индонезиската влада исто така троши десетици милијарди долари на мерки за да се обиде да ги спречи поплавите.

Истражувачите од НАСА и партнерските агенции користеле податоци од 2020 година за да ја создадат оваа мапа за да ги идентификуваат областите на Џакарта кои се во опасност од поплави, пишува Бизнис Инсајдер.

Нусантара има свои предности

Градот е избран за да ја одрази геополитичката визија на претседателот Видодо и да ја евоцира архипелашката природа на Индонезија. Имено, 276 милиони луѓе во земјата се распоредени на повеќе од 17.000 острови.

Нусантара се наоѓа на Борнео, еден од најголемите острови во светот. Борнео е познат по своите дождовни шуми стари 140 милиони години, дом на загрозени автохтони видови, вклучително и орангутани.

Околу три четвртини од островот е територијата на Индонезија, а остатокот се Малезија и Брунеи. Борнео како целина има околу 23 милиони жители. Изградбата започна во јули 2022 година. Видодо испрати околу 100.000 работници да почнат да ја градат Нусантара, а бројот подоцна се зголеми на помеѓу 150.000 и 200.000 како што напредуваше изградбата.

Мрежа од патишта е исечена во шумата од 2022 година за да може да започне изградбата на владини згради и други станови. Почетното население се очекува да биде околу 500.000, според веб-страницата на проектот. Индонезиската влада вети дека ќе го направи градот 100% зелен.

Креаторите на политиката тврдат дека до 2045 година, Нусантара ќе биде „зелена метропола за пешачење“, целосно напојувана од обновлива енергија. До крајот на оваа деценија планираат изградба на соларна централа од 50 мегавати и само електрични возила.

Во проектот се вклучени големи и звучни имиња

Во одборот се и поранешниот британски премиер Тони Блер и престолонаследникот принцот од Абу Даби Мохамед бин Зајед Ал Нахјан. Во октомври, Институтот Тони Блер потпиша договор за изградба на истражувачки центар во новиот главен град.

Но, не се знае од каде се парите. Иако градот се очекува да чини околу 35 милијарди долари, индонезиската влада вети дека ќе обезбеди само околу 20% од средствата и се бори да најде други извори на финансирање. Во март 2022 година, јапонската SoftBank се повлече од проектот.