Фудбалерите на мексиканскиот Тигрес се пласираа во финалето на ФИФА Светското клупско првенство откако во Доха го совладаа бразилскиот Палмеирас со 1:0 во првото полуфинале.

Стрелец на единствениот гол за шампионот на Средна и Северна Америка беше поранешниот француски репрезентативец Андре-Пјер Жињак од пенал во 54. минута.

Фудбалерите на мексиканскиот тим имаа повеќе шанси на натпреварот, посебно во првите 30 минути кога голманот на Палмеирас, Вевертон со неколку одлични интервенции ја зачува сопствената мрежа.
Сепак, по прекршокот на Луан над Карлос Гонзалес, прецизен од белата точка беше Жињак за пласман во финалето на Светското клупско првенство.

Противник на Тигрес во финалето ќе биде подобриот од вториот полуфинален дуел помеѓу африканскиот шампион Ал Ахли од Египет и Баерн Минхен, а средбата се игра утревечер.