Рестрикции, прекини во водоснабдувањето поради дефетки, заматена вода. Ова е горливиот проблем на тетовци стар неколку децении.

Градот има два водоснабдителни системи, стариот кој се снабдува со вода за пиење од шарските извори и новиот водоснабдителен систем кој зема вода од шарските реки Пена и Лешничка.

Според стандардите, на Тетово со околу 80 000 жители потребни му се 200 литри вода во секунда, но и во услови кога има 300 литри, градот се соочува со рестрикции оти 30 % од водата се губи во градска водоводна мрежа стара еден век.

„Најчесто имаме проблеми со приклучоците во мрежата и дефектите настануваат на самите приклучоци, а не во примарната мрежа. Нас ни се потребни 300 литри вода во секунда иако по стандарди на 80 000 граѓани потребни се 210 литри во секунда. Самиот податок покажува дека ние имаме губитоци на вода околу 90 литри во секудна или околу 30 % од водата ни се губи во старата градска водоводна мрежа. Сетоа се должи пред се на дотраени приклучоци. Ние како водовод пратиме метереологија, не очекува сезона која ќе изобилува со снег, што е значајно за нас оти нашите извори се снабдуваат со вода најчесто по топењето на снегот. Сега имаме околу 300 литри вода во секунда кои што ги обезбедуваме од три места, стариот и новиот водоснабдителен систем како и бунарите, но тој е непожелен оти троши струја“, рече Лулзим Шаќири раководител на одделението водовод при ЈКП Тетово.

Во старата градска мрежа се губат многу количини на вода, но колку стариот систем влијае на квалитетот на водата, ако се земе предвид фактот дека имаме азбестни цефки, Шаќири со позитивен одговор.

„Ние земаме мостри од повеќе места низ градот и тие мостри покажуваат дека имаме чиста вода за пиење, таква небезбедна вода не дистрибуираме. Имаме систем на укажување, ако имаме загадена вода тогаш интервенираме со хлорирање и ги почитуваме сите прописи на ставање на хлор во водата. Ние земаме мостри во самата мрежа и над самиот систем. Денеска не сум слушнал, ниту стручен труд сум прочитал дека азбестните водоводни цефки се штетни, но постојат препораки дека треба да се сменат. Но примарните цевки, тие се во добра кондиција, но имаме проблеми со приклучоците кои се стари, но имаме нови градби во градот каде е полесно оти има нови приклучни елементи“, вели Љулзим Шаќири раководител на сектор водовод при ЈКП Тетово.

Досега од градските власти ниту од претходните ниту од сегашните немало никакви најави за реконструкција на дотраената водоводна мрежа.