Во третиот квартал од 2025 година, Тесла ги зголеми испораките на своите електрични возила за седум проценти на годишно ниво, додека конкурентот Ривиан ја намали својата годишна цел за испорака на 41.500-43.500 возила, според денешните изјави на компанијата. Во периодот јули-септември, Тесла испорача вкупно 497.099 возила низ целиот свет, а истовремено произведе 447.450 автомобили. Најголем број испораки беа за Модел 3 и Модел Y, а растот делумно беше поттикнат од забрзаните купувања пред истекот на даночниот кредит на САД за електрични возила на 30 септември, објави CNBC.

Растот на испораките на „Тесла“ во третиот квартал делумно беше компензиран од падот на продажбата во Европа, што беше предизвикано од конкуренцијата од производители како што се „Фолксваген“ и „Бајд“, како и од незадоволството на некои потрошувачи од политичките изјави на Елон Маск. Спротивно на тоа, американскиот пазар забележа силен пораст на побарувачката.

Американската компанија за електрични возила „Ривиан“ ја ревидираше својата годишна цел за испораки на 41.500-43.500 возила, во споредба со претходно очекуван опсег од 40.000-46.000. Од почетокот на годината, пазарната вредност на „Ривиан“ порасна за 10 проценти, на 17,7 милијарди долари, со побавно темпо од растот на технолошкиот индекс „Насдак“, кој скокна за 17,8 проценти, објави „Блумберг“.