Мобилниот телефон кој во „Шутка“ го користел Васил Јованов – возачот кој во средата кај Универзална сала ја прегази 22 годишната Фросина Кулакова која загина на лице место му бил доставен во кутија со колачи.

„Сознанието е дека убиецот на Фросина телефонот го обезбедува од друго притворено лице од соседна ќелија, благодарение на затворски полицаец кој што од едната ќелија носи кутија со колачи во собата каде што се наоѓа Васил Јованов. За тоа е направено плаќање од 250 евра на братот на лицето кое што му го обезбедило телефонот. Тие телефони се одземени“, вели Пандов за Канал5.

Пандов додава дека против затворскиот полицаец е поднесена преставка и истото ќе биде суспендиран.

Васил Јованов  е во 30 дневен притвор, иако според информациите во јавноста, преку неговиот адвокат барал да остане на слобода, убедувајќи го судот дека нема да бега оти му бил одземен пасошот, нема да го повтори делото, ниту да влијае на сведоци.

Денеска во 17 часот под паролата „Секој еден може да е следен“ ќе се одржи голем протестен марш во Скопје. Протестот ќе почне пред Универзалната сала, а потоа насобраните граѓани ќе се движат до Собранието, Основното јавно обвинителство, а ќе се завршат пред Кривичниот суд.