Во основното училиште „Владо Тасевски“ денеска е промовиран еколошки контејнер за собирање, селектирање, рециклирање преработка и отстранување  отпаден текстил на територијата на општина Карпош. Друштвото за управување со отпад од текстил „Еко-текс“ од Скопје ќе постави ваков тип на контејнери во сите десет основни училишта и во градинките во Карпош.

Градоначалникот Стевчо Јакимовски истакна дека на овој начин сите граѓани ќе можат да ги одложуваат своите стари и непотребни алишта во овие наменски и специјализирани еколошки контејнери, наместо во контејнерите за комунален отпад.

Упатувам апел до сите Карпошани, непотребната облека, и сите текстилни материјали, кои им зафаќаат простор во домовите, а сакаат да се ослободат од нив, да ги одложуваат во овие специфични и наменски контејнери, за потоа истите преку рециклирање да имаат упоребна вредност – рече Јакимовски.

Од Општината велат дека и во иднина ќе работат на изнаоѓање креативни решенија со кои ќе се унапреди соработката помеѓу локалната самоуправа и граѓаните, во подигнување на свеста за селекција и рециклирање на разни видови на отпад, се со цел хигиената и чистотата на територијата на Општината да биде издигната на завидно ниво.