Сенатот на Соединетите Американски Држави го потврди Чарлс Кушнер (71), претприемач и татко на Џаред Кушнер, зет на американскиот претседател Доналд Трамп, за амбасадор во Франција.

Трамп го помилува Кушнер во декември 2020 година, откако претходно се изјасни за виновен за даночно затајување и нелегални донации за кампањата, објави АП.

Кушнер, кој доби 51 глас за поддршка, е основач на фирмата за недвижности Kushner Companies.

Неговиот син, Џаред, е поранешен советник во Белата куќа и сопруг на најстарата ќерка на претседателот Трамп, Иванка.

Кога ја објави својата намера да го номинира Кушнер за амбасадор во ноември, Трамп рече дека тој е „исклучителен бизнисмен, филантроп и преговарач“.

На сослушувањето во Сенатот претходно овој месец, Кушнер рече дека ќе соработува тесно со Франција и рече дека ќе ја охрабри Франција да „инвестира повеќе во своите одбранбени капацитети, како и да ја води ЕУ во согласност со визијата на САД за зголемени обврски за европска безбедност“.