САД и нивните азиски сојузници нема да дозволат промена на статус квото на Тајванскиот теснец, изјави за „Вијести“ шефот на претставништвото на Тајпеј во Унгарија.

Сегашната администрација на тајванскиот претседател во заминување Цаи-Инг-вен и новоизбраниот претседател Лаи Чинг-те јасно изјавија дека „Република Кина (Тајван) е независна и суверена земја“, изјави за „Вијести“шефот на претставништвото на Тајпеј во Будимпешта,Ши Чунг Лиу.

Тој посочи дека тоа е „дефиниција на статус кво на сегашната и идната тајванска влада“ и дека меѓународната заедница, предводена од САД и нивните безбедносни партнери, нема да дозволи Пекинг да ја менува со воени средства и дека во случај на напад, Кина ќе мора „да плати висока цена“. Народна Република Кина „никогаш не владеела со Тајван“ и „Кина и Тајван не припаѓаат еден на друг“, изјави Лиу за „Вијести“.

Во време кога тензиите во Тајванскиот теснец се на највисоко ниво од 1996 година, претставникот на Тајпеј во Унгарија вели дека „тајванската влада е посветена на зачувување на статус кво“ на стратешки важниот теснец и „се спротивставува на секој унилатерален обид за промена тој статус, особено преку употреба на воени средства“.

Кина го смета Тајван за своја територија, игнорирајќи ги приговорите на владата во Тајпеј, а во последниве години го засили политичкиот и воениот притисок во Тајванскиот теснец за да ги потврди тие тврдења.

Во јануари, Тајван го избра актуелниот потпретседател Лаи Чинг-те за претседател кој ќе биде инаугуриран во мај. Пекинг го нарекува Лаи Чинг-те „опасен сепаратист“, а во пресрет на изборите им порача на граѓаните на Тајван да изберат меѓу „војна и мир“.

„Зачувувањето на статус квото на Тајван и на Тајванскиот теснец е во интерес на повеќето засегнати страни, вклучувајќи ги САД, Јапонија, Кореја, Филипините. Австралија, европските земји итн.“ „Затоа сите овие земји ја повикаа Кина да се воздржи од употреба на воена сила за да го промени моменталниот статус кво на Тајванскиот теснец“, рече Лиу.

Кина, како што пренесува Ројтерс, најави зголемување на трошоците за одбрана на 7,2 отсто оваа година, што значи зголемување на воениот буџет кој е повеќе од двојно зголемен во текот на 11-те години на власт на претседателот Кси Џинпинг. Некои аналитичари сметаат дека на овој начин Кина покажува дека сака да ја зајакне армијата до тој степен што е подготвена да победи во евентуална војна.

Лиу верува дека потенцијалната кинеска воена акција врз Тајван, „една од најуспешните демократии во светот, стратешки играч во индо-пацифичкиот регион и клучен производител во глобалната индустрија за полупроводници, ќе ја поткопа не само регионалната стабилност, туку и ќе ја наруши глобалниот синџир на снабдување за производство на чипови“.

„Меѓународната заедница, првенствено предводена од САД и нивните азиски безбедносни сојузници, нема да му дозволи на Пекинг да направи таков потег. А Кина ќе мора да плати висока цена ако реши да изврши таков напад“, истакна тој.

Според него, „падот на автономијата на Хонг Конг и руската инвазија на Украина го охрабриле тајванскиот народ да ја брани својата демократија и безбедност“. Тој истакна дека анкетите покажале дека мнозинството од тајванците поддржуваат „задржување на статус кво како такво“ и дека „речиси 80 отсто од тајванците се идентификуваат како Тајванци, а не како Кинези“.