„Напуштена композиција“ на Леонардо да Винчи е пронајдена под една од неговите најпознати слики, „Мадона во карпите“, соопштила националната галерија во Лондон.

„Мадона во карпите“ е предвидена како централен експонат на изложбата посветена на ренесансниот гениј, која ја подготвува лондонската галерија.

Експертите кои работеле на подготовката на ремек-делото за поставување случајно забележиле дека таа под површината крие вистинско богатство.

Откриено е дека Да Винчи на истото платно започнал цртеж, а потоа се откажал и над него насликал дело на кое човештвото му се восхитува веќе пет векови.

На платното се забележени почетни потези на ангел и бебето Исус, како и отпечатоци на рацете на уметникот и на асистентот.

Споредувајќи ја познатата слика со снимката под која се гледа цртежот, забележливо е дека Да Винчи го сменил аголот на бебето Исус и дека тоа се гледа од профил и дека отстранил неколку локни.

Цртежите се откриени бидејќи се работени со материјал со цинк кој е видлив под икс-зраците.