Британските воени претставници ги откажаа плановите за распоредување на околу 30.000 војници во украинските пристаништа и градови во случај на прекин на огнот меѓу Москва и Киев, објави „Тајмс“ во среда.

Според весникот, сега се разгледува „пореална мисија“, која би се базирала на „патролни летови“ над западна Украина, со користење авиони како што се „Тајфуни“ или „Ф-35“, за целите на одвраќање.

Планирано е сојузниците на Киев да помогнат во обуката на украинската војска и чистењето на мините од Црното Море, при што повеќето активности ќе се одвиваат на западот од земјата, каде што ризикот од напад е помал. Улогата на Соединетите Американски Држави во овој план засега останува нејасна. Москва постојано предупредува дека нема да толерира присуство на која било членка на НАТО во Украина, без оглед на околностите.

Украинскиот претседател Володимир Зеленски разговараше со британскиот премиер Кир Стармер и неколку европски лидери пред состанокот меѓу рускиот претседател Владимир Путин и неговиот американски колега Доналд Трамп, закажан за петок во Алјаска.

Стармер рече дека сојузниците на Киев имаат веродостојни планови да испратат „безбедносни сили“ во Украина. Тој оцени дека постои „реална шанса“ за прекин на огнот, но нагласи дека територијалниот интегритет на Украина мора да биде заштитен.

Во исто време, неколку европски земји веќе изразија резерви во врска со испраќањето на свои трупи во Украина. Полска, Шпанија и Германија ја отфрлија можноста за учество во таква мисија, наведувајќи го ризикот од ескалација.