Поранешниот претседател на Србија, Борис Тадиќ, на Твитер напиша дека она што го кажа претседателот Александар Вучиќ за уцената упатена до Србија за да го прифати европскиот план за Косово, говори дека за време на оваа власт Србија е „целосно понижена земја“.

„Вучиќ цела деценија се фали дека Србија за време на неговото владеење била почитувана земја, која веќе никој не може да ја понижува и уценува. Она што сега го кажа за уцената испратена до Србија јасно покажува дека за време на оваа влада Србија е целосно понижена земја“, напиша Тадиќ на Твитер за време на обраќањето на претседателот Вучиќ до јавноста.

Vučić se deceniju hvali kako je Srbija u vreme njegove vlasti poštovana država, koju više niko ne može da ponižava i ucenjuje.
Ono što je sada izneo o ucenama koje su upućene Srbiji jasno govori o tome da je tokom ove vlasti Srbija potpuno ponižena država…

— Boris Tadić (@BorisTadic58) January 23, 2023

На говорот на Вучиќ, кој рече дека Србија е под ултиматум од Западот околу прифаќањето на европскиот план за Косово, реагираше и Партијата на слободата и правдата, односно нејзиниот претседател Драган Ѓилас:

„За мене би било кривично дело некој да го признае Косово, но исто така би било злосторство некој да ја негира европската иднина на генерациите што доаѓаат“, вели опозиционерот Ѓилас.

Вучиќ во обраќањето рече дека европските претставници во моментов имаат досега најостар пристап кон прашањата околу Косово и дека на средбите му било јасно кажано која ќе биде цената за Србија доколку властите во Белград не го прифатат последниот европски план.

„Ќе се соочите, под еден: со прекин на евроинтегративниот процес, под два: ќе се соочите со запирање и повлекување на инвестициите, под три – сеопфатни мерки во политичка и економска смисла, што ќе ѝ наштетат на Србија. Ова ми беше повторено уште трипати во текот на разговорот и секојпат жестоко реагирав“, рече Вучиќ.