Судската независност и зајакнување на професионализмот на државните институции мора да станат главен приоритет во регионот за постигнување на одржливи резултати во борбата против корупцијата.

Соработката меѓу владите и граѓанскиот сектор е исто така клучна во оваа борба, потенцираше шефицата на меѓународен сериозен и организиран криминал – билатерален заменик-директор при Министерството за внатрешни работи на Обединетото Кралство и FCDO Сузи Дајкин.

Таа на денешната конференција за борба против корупцијата во Скопје порача дека е потребно да се зајакне усогласеноста и транспарентноста во бизнис секторот, но и да се зајакне соработката со граѓанскиот сектор, за корупцијата да не пушти корени во нашето општество.

Корупцијата е огромен предизвик за владеење на правото во овој регион и креира плодна средина за организираниот криминал. Корупцијата и наштетува на економијата и на општеството и има големи и опсежни имликации. Обединетото Кралство се грижи за иднината на овој регион, рече Дајкин.

Таа додаде дека не смееме да си дозволиме регионот да стане место за организиран криминал, затоа што ќе има многу лошо влијание врз егзистенцијата на луѓето.

Дајкин порача дека Обединетото Кралство е гордо што е дел од оваа мисија во борбата против корупцијата, но напомена дека треба да продолжат активностите на државите во меѓународните рамки.

Граѓанскиот сектор има свои активности и алатки во борба против корупцијата, но се уште постојат одредени празнини, а разочарувачко е дека не е направен поголем прогрес во адресирање на проблемите во делот на корупцијата. Имаме цврсти заложби во борбата против организираниот криминал и посветени сме да соработуваме со законодавството, со приватниот и граѓанскиот сектор, како и со меѓународните партнери, рече Дајкин.

Ерик Мејер, заменик шефот на мисијата во амбасадата на Соединетите Американски Држави (САД) во Северна Македонија на денешната конференција посочи дека корупцијата, финансискиот криминал и други коруптивни активности се заеднички закани во регионот.

Тој потенцираше дека САД ќе продолжи да ги поддржува напорите на регионот во борбата против корупцијата, но како што рече, за да се постигне успех, во секоја земја треба политичка волја од лидерите, потребно е судство кое ќе е независно и ослободено од политичките влијанија. Секоја земја, како што порача, треба да има свои активности во оваа борба, и да има одговорност за обврските кои ги презема.