Шпански суд нареди привремено суспендирање на казните што владата во Мадрид им ги изрече на две нискобуџетни авиокомпании за практики како што се наплата на такси за преголем багаж, за кои Министерството за заштита на потрошувачите вели дека ги кршат правата на клиентите. „Рајанер“ и „Норвејз ер“ поднесоа жалба против одлуката, откако минатата година беа казнети со 109,6 милиони евра, тврдејќи дека казната е неоснована, објави Ројтерс.

Судот рече дека во моментов е невозможно да се дојде до суштината на проблемот и дека плаќањето на казната додека се оспорува на суд би претставувало финансиски товар за компаниите.

Агенцијата истакнува дека наредбата за суспензија претставува прва победа за авиокомпаниите, а индустриската група АЛА ја пофали одлуката на судот, велејќи дека казните „го ограничуваат изборот на клиентите“. Таму се вели дека авиокомпаниите ќе продолжат со своите политики за наплата сè додека не се донесе конечна пресуда. Административниот суд во Мадрид им наложи на двете авиокомпании да издадат банкарски гаранции во вредност од 111,8 милиони евра, што е еквивалентно на санкции и камата, додека трае суспензијата. Минатата година, и други авиокомпании беа казнети од шпанското Министерство за заштита на потрошувачите.