За повторените судења за „Таргет-тврдина“ и за „Трезор“ во кои еден од обвинетите е поранешниот директор на Управата за безбедност и контраразузнавање (УБК) Сашо Мијалков, се закажани термини кон крајот на месецов и, како што информираат во Основниот кривичен суд Скопје, тие ќе добијат на интензитет за да се одбегне нивно евентуално застарување.

– Судиите од двата предмети се согласија дека треба да им се даде на интензитет – велат во Судот.

На прашање зошто рочиште за „Таргет-тврдина“ не е закажано порано, во Судот одговорија дека судијата Илија Трпков постапува по други предмети.

„Таргет – Тврдина“ е случајот за масовното прислушување, каде што првообвинет е Мијалков и за кој Апелацискиот суд пред неколку месеци ја укина пресудата на која и претходеше процес од пет години. Ако динамиката тече исто како и претходно, а делата на обвинетите им застаруваат во 2025 година, односно за две години, тогаш пресметките покажуваат дека е невозможно да се дочека одговорност за масовното прислушување.

За „Трезор“, Мијалков беше осуден на осум години затвор и требаше во буџетот да врати и 860 илјади денари за колку што го оштетил буџетот при набавка на опрема и услуги за УБК/МВР. Апелацијата ја укина пресудата со образложение дека Кривичниот суд направил суштествени повреди во постапката.