Во своите мемоари насловени  „На мојот часовник“, поранешниот генерален секретар на НАТО, Јенс Столтенберг, открива детали од самитот во 2018 година кога Доналд Трамп отворено се заканил дека ќе го напушти состанокот. Причината била незадоволството од европските сојузници кои не ја исполнувале целта за одбрана од 2% од БДП, со посебен фокус врз Германија на Ангела Меркел, објави бриселскиот портал Еуроактив.

Столтенберг пишува дека ситуацијата била смирена откако холандскиот премиер Марк Руте посочил на зголемувањето на европските трошоци за одбрана, а Трамп му подал белешка со услов: НАТО јавно да признае дека заслугата е негова.

„Финско решение“ за Украина

Во книгата Столтенберг открива и како го советувал украинскиот претседател Володимир Зеленски да разгледа можност за територијални отстапки кон Русија, според моделот на Финска по Втората светска војна. Зеленски во почетокот ја отфрлил идејата, но, како што наведува Столтенберг, со тек на време неговите советници станале „помалку категорични“ под услов Украина да добие гаранции за безбедност преку членство во НАТО.

Тензиите со Франција

Мемоарите откриваат и незадоволство во Париз. Франција, според Столтенберг, во 2021 година отворено ја изразила својата фрустрација од неговото водство, обвинувајќи го дека презел „преголема улога“ и дека се спротивставил на дел од француските реформски иницијативи во рамките на алијансата.

Јенс Столтенберг, кој го водеше НАТО од 2014 до 2024 година, ја претставува својата деценија на чело на алијансата како период обележан со растечки тензии меѓу САД и Европа, внатрешни поделби и историски одлуки околу Украина.