Договорот потпишан со Обединетото Кралство следната недела ќе биде во собраниска процедура и ќе биде јавен за сите, соопшти вечерва пратеникот Бојан Стојановски од ВМРО-ДПМНЕ.

Стојановски во гостување на телевизијата „Сител“ рече дека сè ќе биде јавно и транспарентно.

– Овој договор нема да биде како овие договори досега во четири очи, туку се ќе биде јавно и транспарентно, секој милиметар и секоја буква од тој договор и оние што ќе следат во иднина ќе бидат јавно претставени на јавноста и ќе бидат доставени во Владата и во Собранието, затоа што сметаме дека јавноста го заслужува тоа. Ние немаме што да криеме во договорите – рече Стојаноски.

Договорот вчера во Лондон го потпиша вицепремиерот и министер за транспорт Александар Николоски и британскиот министер за економија и извоз Герет Томас. Средствата обезбедени од овој договор ќе се користат за инфраструктурни проекти во железницата, здравството и образованието.

Пред потпишувањето на договорот, македонската Влада го усвои текстот на Договорот откако премиерот Христијан Мицкоски и неговиот британски колега Кир Стармер на Самитот на Европската политичка заендица во Тирана, постигнаа согласност за стратешко партнерство.

Од опозицијата излегоа со забелешка за нетранспарентност за договорот за стратешко партнерство со Обединетото Кралство.