Советникот за енергетика Виктор Андоновски уште еднаш ги повика училиштата што не се пријавиле за субвенционирана струја, тоа да го направат веднаш, затоа што рокот истекува в петок. Овие училишта, субвенционираната струја ќе ја добиваат од 1 февруари. Од 1 јануари, пак, субвенционирана струја добиваат 374 училишта, од вкупно 474.

– Во овој период треба сите да се однесуваме одговорно. Владата обезбеди субвенционирана струја за основните и за средните училишта. Апелираме до оние што не го направиле тоа, да ги поднесат барањата за субвенционираната струја, а на располагање им стојат службите на ЕСМ. Учениците имаат право на непречена настава и на топли училници, а општините на помали трошоци – рече Андоновски на денешната прес-конференција.

Тој рече и дека производство од ЕСМ целосно ги задоволува потребите на домаќинствата и на малите потрошувачи, како и на болниците, училиштата, прехранбените претпријатија и на други витални објекти.

– Оваа година почна со стабилно домашно производство. Неколку денови по ред ЕСМ-производство продава и ноќни вишоци. Во периодот од 12 до 17 јануари продадени се 1.920 мегават-часови ноќни вишоци на транспарентен начин.

Вчера се произведени вкупно 17.252 мегават-часови електрична енергија, од кои 13.801 термална и 3.951 од обновливи извори.