Актуелниот градоначалник на Гази Баба од редовите на ВМРО-ДПМНЕ, Бобан Стефковски кој е во трката за нов мандат најави реконструкција на големите локални улици и завршување на проектот „Гази Баба без кал“, кој го најави уште во 2022 година.

„Во насока на унапредување на инфраструктурата и секојдневието во нашите населби, започнуваме со комплетна реконструкција на големите локални улици. Ќе ги реконструираме улиците Лазар Поп Трајков – Автокоманда; Анри Барбис и Карл Хрон – Триангла; Среќко Пужалка и Финска – Ченто; Пехчевска – Хиподром; 2 и 18 – Инџиково; Трајко Китанчев – Ченто; 10 и 3 – Јурумлери“.

Тој истакна дека во неговиот прв мандат биле асфалтирани повеќе од 170 локални улици.

„Дополнително во вториот мандат ќе асфалтираме и над 100 нови улици, надвор од овој проект. Проектот ‘Гази Баба без кал’ продолжува. Во следните 4 години ќе биде целосно завршен“, ветува Стефковски.

Претходно, во 2022 година Стефковски го најави овој проект за кој, како што кажа тогаш, биле одвоени 73 милиони денари и вети дека до крајот на неговиот мандат нема да има неасфалтирана улица во Гази Баба.

„Во буџетот за 2023 година обезбедуваме 73.000.000 денари за рехабилитација и ревитализација на улици. За прв пат во историјата на општината се определуваат 73.000.000 денари за асфалтирање на улици. Моја јасна определба е Гази Баба без кал, а тоа значи до крајот на мандатот да нема неасфалтирана улица во општина Гази Баба“, рече тогаш Стефковски.