Сеопфатниот договор за стратешко партнерство меѓу Русија и Иран официјално стапи во сила, објави руското Министерство за надворешни работи.

„Договорот го одразува стратешкиот избор на највисокото политичко раководство на Русија и Иран во корист на понатамошно сеопфатно зајакнување на пријателските, добрососедски односи, што ги задоволува фундаменталните интереси на народите на двете земји“, се вели во соопштението, објави РИА Новости.

Договорот беше потпишан на 17 јануари за време на посетата на иранскиот претседател Масуд Пезешкијан на Москва.

Министерството додаде дека овој настан означува важна пресвртница во историјата на односите меѓу двете земји, кои достигнаа квалитативно ново ниво на сеопфатно стратешко партнерство.

Страните се стремат да ги продлабочат и прошират односите во сите области од заеднички интерес.

Москва и Техеран се согласија да ја одржуваат трговската и економската соработка и тесно да соработуваат во спроведувањето заеднички воени вежби.
Доколку едната од страните е подложена на агресија, другата не смее да му пружи помош на агресорот.

Русија и Иран нема да дозволат нивната територија да се користи за поддршка на сепаратистички движења што го загрозуваат нивниот територијален интегритет.

Земјите имаат намера да се спротивстават на употребата на санкции, сметајќи го нивното воведување меѓународно нелегално.

Тие ќе се воздржат од приклучување кон трети земји во наметнувањето ограничувања едни на други и ќе гарантираат некористење на еднострани принудни мерки.

Москва и Техеран се согласија да ја зајакнат медиумската соработка за борба против дезинформациите и негативната пропаганда.
Земјите ќе обезбедат помош во спречувањето на природни и вештачки предизвикани катастрофи и ќе соработуваат во создавањето инфраструктура за плаќање независна од трети земји.
Гасоводот од Русија до Иран ќе поминува низ Азербејџан, а страните преговараат за пристапи кон цените.

Москва и Техеран се заинтересирани за заеднички проекти во областа на мирна нуклеарна енергија, вклучително и изградба на нуклеарни електрани.

Страните ќе соработуваат во борбата против меѓународниот тероризам и други предизвици и закани.

Договорот е склучен за 20 години со автоматско обновување за следните пет години.