Приближно 500 членови од синдикатите што се дел органите и телата на Сојузот на синдикати вчера се упатија од зградата на ССМ кон Врховниот суд каде што, како што потенцираа, им го завртеа грбот на судиите, им дадоа жолт картон и побараа враќање на Работничкиот дом во рацете на работниците. Врховен суд на 9 ноември минатата година донесе пресуда според која зградата на ССМ оди во рацете на државата. Синдикатот бара повторување на постапката и потсетува дека Уставниот суд веќе одлучувал во 1992 година, а одлука во корист на работниците имало и од Врховниот суд во 2004 година.

– Дојдовме да им го завртиме грбот на оние судии што ја донесоа срамната пресуда, затоа што тројца судии сакаат да направат штета на целото работничко движење, да го укинат Сојузот на синдикатите на Македонија на ваков начин, да направат да молчи, да биде понизен и послушен – рече претседателот на ССМ, Слободан Трендафилов.

поред него, станува збор за слободно судско убедување, со кое се одзема имот што е граден со парите на работниците. Тој повика да се уважи мислење на двајцата судечки судии, кои се изјасниле во корист на работниците.

– Вакво чудо нема никаде, суд со пресуда да им одземе имот на работници што двоеле од својата уста, од лебот, од членарината, за да го дадат на државата да го раскрчми. Го сочувавме во време на транзицијата кога олигарсите ги раскрчмија компаниите, сега државата го сака овој имот – рече Трендафилов.

Тој рече дека Синдикатот бара најдоцна до 1 мај да се преиначи пресудата што е донесена на штета на работниците.

До 15 мај ни истекува рокот за тужба, не сакаме да се доведеме во ситуација работници да ја тужат државата пред Меѓународниот суд во Стразбур. Но, ќе бидеме ригорозни. Ако судиите ни влегоа во нашиот дом, тогаш работниците ќе влезат во нивниот дом – порача претседателот на ССМ.

На 18 април е закажано рочиште во Основниот суд.

– Поднесовме предлог за повторување на постапката поради новите докази. Единствените синдикати на Македонија како што се нарекувале во 1948 година идејата ја почнале со „Слобода на народот, смрт на фашизмот“. Тогаш обезбедиле 10 проценти од средствата потребни за изградба на оваа зграда и за 10 години ги обезбедиле сите пари, а државата немала инвестиција ниту еден тогашен динар – рече Трендафилов.