Жените го сочинуваат најголемиот дел од вработените во работните места за чистење, подготовка и нега, а честопати немаат ни соодветни, пишани договори за вработување. Со тоа што немаат никаков договор, им се одбива здравствено осигурување, платено боледување и породилно отсуство, анализира Н1. Коренот на проблемот лежи во српското законодавство, т.е. недоволно добро регулирани одредби поврзани со работата во домаќинството. Работата на жените на работните места за чистење е првенствено дефинирана со Законот за работни односи – во член 45 од овој Закон, но проблемот лежи во неговите недоволно прецизни одредби.

„Работата на домашните работници е дефинирана само во еден член од Законот и тоа е апсолутно недоволно, со оглед на бројот на лица, пред сè жени, кои работат во чистење и нега во туѓи домови. Во членот 45 е дефинирано само правото на засновање работен однос, како и определување на надоместокот што може да се плати. Останатите права, почнувајќи од минималната плата, преку здравствено и пензиско осигурување, до боледување, годишни и дневни одмори (паузи), останаа доста недефинирани. На овој начин извршувањето на работите за чистење и нега во домаќинствата генерално останува во доменот на сивата економија“, изјави адвокатот и експерт по трудово право, Никола Пањковиќ.

Адвокатката од синдикатот „Слога“,Лидија Јовановиќ, вели дека проблемот е што Законот не се применува, но и што е застарен и не ги следи трендовите на вработување во оваа област.

„Денес имаме нови начини на вработување на жените во оваа област кои не се законски признати и даваат можности за злоупотреба. Вработувањето се движи од неформални вербални договори до барање работа преку различни платформи и агенции. Сето ова дава можност за злоупотреба и ускратување на правата на работничките, како што се здравственото, пензиското и инвалидското осигурување, како и заштита во случај на бременост“, посочува Јовановиќ.