Речиси сите српски електронски, пишани и интернет медиуми ја проследија посетата на грчкиот премиер Алексис Ципрас со премиерот Зоран Заев во Скопје. Повеќето од нив, посетата ја означија како „историска”, со наслови „Историски селфи-премиерот на Грција за прв пат во Северна Македонија”-  според РТС , „Средбата на Заев и Ципрас во Скопје започна со прегратки и селфи” како што во еден од повеќето текстови објави весникот Данас, а слични наслови и со терминот „историска” објавија и Б-92, Слободна Европа (на српски јазик), Курир, Нови Магазин, Телеграф и други медиуми, меѓу кои и Спутник Србија, за разлика од електронското издание на Политика која за посетата одеше со насловот „Средбата на Ципрас и Заев без интонирање на химните”.

Српските медиуми со повеќе текстови нашироко ја опишуваат посетата на владината делегација на премиерот Ципрас на Скопје, со детали од посетата со премиерот Заев и од прес-конференцијата на двајцата премиери.

Така ТВ Н 1 текстот со наслов „Ципрас-Грчки авиони ќе го надгледуваат воздушниот простор над Северна Македонија” ги пренесува изјавите на двајцата премиери од прес конференцијата, како и весникот Вечерни Новости кои објавија вест со насловот „Заев-моето пријателство со Ципрас, е модел за граѓаните”. РТС во електронското издание објави уште еден текст, за прес конференцијата, со наслов-„Грчкиот премиер во Скопје, како да се надокнадат три загубени децении”.

И српските новински агенции опширно и со повеќе текстови пишуваат за посетата. Танјуг го пренесува твитот на Ципрас дека Северна Македонија и Грција мораат да бидат сојузници, веста на АНА-МПА за отварањето на нова ера во односите и детали од прес конференцијата на двајцата премиери. И Бета во насловот „Ципрас-грчки авиони ќе го чуваат небото на Северна Македонија” дава опширно детали од пресот на двајцата премиери, слично како и агенцијата ФоНет.