Фудбалските лиги во Србија нема да се пополнуваат според пласманот на екипите во претходното првенство како што е пракса во целиот свет, туку местото ќе се пополнува – со пари.

Одборот за итни прашања при ФСС донесе одлука испразнетите места во лигите да се купат, поточно екипата која има највеќе пари, односно која ќе понуди највеќе пари, да го замени клубот кој се откажал од натпреварувањето.

Главниот услов е клубот да игра само еден ранг пониско од екипата која се откажала од натпреварувањето.

„ Понудата на клубот се поднесува во пишана форма и мора да го содржи износот на финансиски средства кои клубот е подготвен да ги плати за да се стекне со право да игра во конкурентна лига во која се појавиле едно или повеќе слободни места“,  стои во одлуката на ФСС објавена на 10 мај.

Очекувано, оваа чудна одлука предизвика жестока реакција од српскиот синдикат на фудбалери „Независност“.

– Најголем срам во историјата на српскиот фудбал! Ако се појави испразнето место во Суперлигата или Првата лига, место ќе се пополни со клуб кој ќе плати најмногу на сметката на ФСС. Исто е и за ниските лиги, со тоа што се плаќа на општинските сојузи. Срамно и понижувачки – изјави Мирко Поледица претседател на „Независност“.