Владата на Србија му го укинала имунитетот на министерот за градежништво во оставка Горан Весиќ, непосредно пред да му биде одреден притвор во врска со уривањето на настрешницата на железничката станица во Нови Сад на 1 ноември. Трагедијата и смртта на 15 луѓе поттикна масовни протести низ Србија против корупција.

Весиќ беше уапсен заедно со уште 11 осомничени лица во четвртокот, а во петокот му бил укинат имунитетот, а во саботата мубил одреден 30-дневен притвор, исто како и на поранешниот директор на инфраструктурата на Железници на Србија, Небојша Шурлан.

Вишиот суд во Нови Сад им одредил домашен притвор со електронски надзор на директорката во оставка Јелена Танасковиќ и на помошничката министер за железнички сообраќај Анита Димовски.

Тие се товарат за тешко дело против општата сигурност во врска со делото предизвикување општа опасност.