Ученици од десетици средни училишта во Израел штрајкуваа денес, на првиот ден од новата учебна година, барајќи да се постигне договор за ослободување на израелските заложници што ги држи палестинското милитантно движење Хамас.

Средношколците, како што објави „Тајмс оф Израел“, одбија да се вратат во училниците, со оглед на продолжувањето на конфликтот во Газа и одложувањето на преговорите за ослободување на заложниците.

Во Тел Авив во неделата, неколку десетици тинејџери демонстранти го блокираа сообраќајот и ги запалија училишните клупи, барајќи генерален штрајк пред почетокот на новата учебна година.

Полицијата уапси две лица, 17-годишно момче и 35-годишна жена, под обвинение за нарушување на јавниот ред и мир.

Околу 20 лица беа приведени од полицијата на лице место, а подоцна беа ослободени.