Амбасадорот на САД во Белград, Кристофер Хил, вечерва гостувајќи на телевизијата „Њузмакс Балканс“ оцени дека „Србија јасно се врти кон Запад“ и оти „сака да верува дека САД и Србија добро се разбираат“, како и дека работат заедно на прашања „не само меѓу двете земји, туку и со други земји“.

Хил рече дека е исклучително важен и фактот што Србија ја поддржува Украина во борбата против руската инвазија и дека тоа „многу ја разјасни ситуацијата во последните години“.

– Мислам дека Србија е на вистинскиот пат, а ние секако ги споделуваме и поддржуваме аспирациите на Србија за членство во Европската унија, рече Хил, кој на амбасадорската позиција беше назначен од администрацијата на американскиот претседател во заминување Џо Бајден.

Хил во 90-тите, заедно со Ричард Холбрук, беше еден од архитектите на Дејтонскиот договор со кој се стави крај на војната во Босна и Херцеговина, а беше и американски амбасадор во Албанија и во Македонија, пред да биде испратен на амбасадорски позиции во Полска, Јужна Кореја и Ирак.

Запрашан за можна промена на американската политика кон Србија, со оглед на промената на власта во Вашингтон, Хил рече дека изборите во САД се одржуваат на секои четири години и дека Америка „често ги менува“ владите, но дека, според неговото верување, Србија и неговата земја имаат „некои заеднички интереси кои не се менуваат со администрацијата“.

– Мислам дека односите меѓу САД и Србија ги насочивме во многу позитивна насока и очекувам тие да станат уште подобри, рече Хил.