Ја исплативме втората рата од авансот во износ од 411,75 милиони евра за набавка на нови француски борбени авиони „рафал“, соопшти министерот за финансии на Србија Синиша Мали.

– Првата рата од авансот, во истиот износ, беше исплатена во октомври минатата година, а со денешната исплата е платен целиот аванс од 30 проценти за набавка на рафалите. Инаку, договорот за купување на 12 нови „рафали“, кои се сметаат за едни од најдобрите повеќенаменски борбени авиони во светот, беше потпишан на крајот на август минатата година во Белград, во присуство на српскиот претседател Александар Вучиќ и францускиот претседател Емануел Макрон. Стекнувањето на овие авиони и опрема ќе придонесе за зголемување на оперативните способности на нашата војска и ќе обезбеди долгорочна заштита на воздушниот простор на нашата земја – напиша српскиот министер на Инстаграм.

Според него, оваа голема и важна инвестиција ќе влијае на севкупната безбедност на државата и граѓаните.

„Иако ова е една од најголемите набавки во финансиска смисла за српските вооружени сили, имаме доволно пари за оваа капитална инвестиција во безбедносниот сектор, без на никаков начин да ги загрозиме нашите јавни финансии и да го зголемиме учеството на јавниот долг во БДП“, напиша Мали на социјалната мрежа Инстаграм.