Shirat e dendur të shkaktuara nga stuhia tropikale Mawar dhe shirat josezonale vazhduan sot në pjesën më të madhe të Japonisë, duke bërë që autoritetet të lëshojnë paralajmërime për dëme dhe të bllokojnë shumë njerëz pasi shërbimet e trenave u pezulluan, raporton Reuters.

Edhe pse Mawar është dobësuar nga statusi i super tajfunit, Agjencia Meteorologjike e Japonisë (JMA) u ka kërkuar njerëzve që të jenë në gatishmëri të lartë për rrëshqitje të dheut, lumenj të fryrë dhe përmbytje në Japoninë lindore, ndërsa paralajmëron për rrëshqitje të dheut në Japoninë perëndimore.

Një person ka humbur jetën si pasojë e stuhisë. Rreth 7.000 familje në rajonet lindore dhe perëndimore kanë mbetur pa energji elektrike, por puna e restaurimit është duke u zhvilluar, tha të shtunën Ministria e Industrisë.

Trenat me plumb Shinkansen, të pezulluar nga Tokio në Nagoya në Japoninë qendrore që nga e premtja, rifilluan funksionimin sot, njoftoi agjencia e lajmeve Kyodo.

Moti pritet të përmirësohet në pjesën më të madhe të Japonisë më vonë gjatë ditës, tha transmetuesi publik NHK.

Një front i sezonit me shi është bërë më aktiv për shkak të fluksit të sasive të mëdha të ajrit të lagësht nga Mawar, i cili shkaktoi kërdi në Guam në fillim të kësaj jave.