Лоша инфраструктура, преголема урбанизација, недостиг на паркинг-места, јавна хигиена под секое ниво, малку зелени простори, правливи улици, сообраќаен хаос, исушени треви, трки со мотори по булеварите во ноќните часови, пребрзо возење – сето тоа е само дел од она со кое секојдневно е принуден да живее секој жител на Скопје, без оглед во кој дел од градот е неговиот дом.

Градилиштата низ Скопје, кои во изминатите години со несмален интензитет никнуваат на секој слободен простор, го узурпираат јавниот простор, тротоарите, дел од улиците и го прават небезбедно движењето на пешаците. Покрај тоа, постојаната бучава им го одзема мирот на жителите од соседството, а прашината што се крева, го загадува воздухот.

Во моментов во централното градско подрачје има три големи градилишта, тоа е поранешниот простор на некогашната фабрика „Треска“ каде што ќе се дигне цела населба според предвидениот број нови згради, потоа зградите на „Лимак“, како и градилиштето спроти „Холидеј ин“ каде што се градат три висококатници. Покрај нив, не запира ниту изградбата на станбени објекти во Дебар Маало и во Буњаковец, особено на уличките зад „Универзална сала“.

За градилиштата во Дебар Маало реагираа и од граѓанската иницијатива „Шанса за Центар“ од каде што велат – Устав се менува, ама ДУП никако.

Без усул ни за соседското право или безбедноста, спокојот на жителите или на децата од градинката. Ова е сѐ за што локалните власти управувани од партиите велат дека е по дозвола, по план од 2012 година, одобрено од инспектори и служби. Вака изгледа кога по 15 години се спроведуваат погрешни планови. И да се потсетиме: Устав се менува, ама ДУП никако – посочија од Шанса за Центар од каде што на социјалните мрежи споделија фотографии на кои се прикажуваат градилишта во оваа центарска населба.

Граѓаните постојано го искажуваат своето незадоволство од постојаната изградба и отворање нови градилишта. Велат дека за некоја година сето ова ќе доведе до потребата од масовно иселување од градот.

Еве водоводот веќе полека откажува, ќе почне така и струјата, ќе се распрсне Скопје по сите „шевови“. Ова неколку години наназад го кажувам. И така ќе биде – вели жител на Дебар Маало.

Се жалат и граѓани што живеат во близина на „Треска“, велат дека се наголтале прашина и дека немаат ни мир ни спокој од постојаната бучава од градилиштата, каде што се градат истовремено неколку згради.

Слично е и во Буњаковец, а и во реонот кај основното училиште „Песталоци“.

Не се добројуваат градилишта, живеењето стана мачно. Од рано сабајле хилти, камиони, ноќе ечи музика од кафани до наутро. Неподносливо е живеењето, буквално на секоја улица во зона Буњаковец има минимум по едно градилиште, кои ни го прават животот ужасен. Немаш каде ни како пешак да поминеш, а за со возило – рулет играме. А од прашината и од звуците од градилиштата немаме мир ни можност за одмор ни за празник ни за делник. Уште од 7 часот почнуваат и не запираат до доцна навечер – ја објаснува состојбата жителка на Буњаковец.

Прекумерната урбанизација не е само обележје за општина Центар, слично е и во другите општини. На пример, населбата Автокоманда цело лето „кубури“ со вода, а од „Водовод и канализација“ им посочиле дека ситуацијата ќе биде уште полоша кога ќе се вселат станарите во новите згради кај „Ист гејт“. Проблемот е што потребната инфраструктура, како што е водоводната мрежа и канализација, не ја следи изградбата на нови згради.

Решение е при подготвување детални урбанистички планови уште во проектна фаза да се размислува за нова техничка инфраструктура за водоснабдување, значи на пумпни станици, резервоари и на примарна мрежа – вели Дејан Димовски, задолжен за електромашинско одржување и техничко следење и мониторинг на потрошувачката на вода во ЈП „Водовод и канализација“.

Според него, генерирањето на ДУП не значи само изградба на нови населби и згради, претходно треба да се финансира и во водоводна и канализациска мрежа.

Град Скопје: Проблем не е водата, проблем се оние што ја добиваат џабе и институциите што ги штитат

Интензивната изградба и неконтролираното ширење на населбите, годинава сериозно се почувствува со недостиг на вода, особено во повисоките зони на градот, на пример на Водно, кај некогашна „Панорама“ каде што сега се извишуваат повеќе згради. Размислуваат ли оние што носат урбанистички планови и даваат дозволи за градби, кои ќе бидат последиците врз градот идните години?

Малтретирањето на граѓаните со бучава, прашина и узурпацијата на јавниот простор ќе се спречи само ако се намали изградбата во наредните години. Но, сѐ додека општините имаат најголеми приходи од комуналиите што инвеститорите ги плаќаат при издавање дозвола за градба – ништо нема да се промени. Колку и надлежните да пропагираат дека се залагаат за развој на градот, за планска изградба и за чист воздух, со години наназад секојдневно секој скопјанец гледа дека ветувањата се многу далеку од она што се случува на терен.